Inhoudsopgave
Weurt ’t noe weer rösteg op d’n tèllevisie? Goon veer ’t noe weer euver get aanders höbbe? ’t Is te hope.
De lèsten tied waors ’t gewoen ermooj op d’n tèllevisie. D’r waor niks aanders es de verkezinge, peilinge en de slumste mins. De lui höbbe zin in get aanders, get um te lache.
D’n oetslaag vaan de verkezinge heet ‘ne winnaar opgelieverd meh of ederein ziech de koumenden tied ouch winnaar zal veule is nog mer gans de vraog. In eder partijprogramma stoonte de nudege zoer bunekes die veer aon ’t slikke koume.
Kinne veer verwachte tot väöl nui hoezer gebouwd goon weure? Es ‘ne korewolf of ‘ne salemander in de weeg zit verdwijne de planne weer eve hel nao de oonderste laoj vaan ’t bureau. Zörg is ouch hel nudeg want euver ’t allegemein weure veer allemaol awwer en höbbe veer hölp nudeg bij de normaalste zakes, meh veer kinne ’t neet mie zelf, dus höbbe veer hölp vaan doon.
Eus veilegheid steit ouch in alle programma’s. Wat dee mins in Rusland vaan plan is wèt heer allein zelf en dat blijf ’n bedreiging veur hiel väöl aandere. Zelfs Trump liet ziech inpakke door häöm. De touwkoms blijf dus duuster en oonzeker.
’t Is en blijf noe aofwachte wat oetindelek oet de bös kump en welke regering us veer jaor de wèt geit veursjrieve. Veer mote mer vertrouwe höbbe tot ’t allemaol good kump.
In Mestreech goon veer us de koumenden tied riechte op de fiesdaog. Iers kump Sinterklaos en dee gooje mins heet ’t de lèste jaore ouch neet gemekelek gehad. Ziene bèste kameraod, dee veur häöm aon mennege sjouw luusterde en mèt häöm euverlag welk kedo op z’n plaots waors, laog oonder vuur.
Daan kump de Keersemes. Ummer mie lempkes koume te haange in de stad en dat is veur väöl lui aontrekkelek. Mestreech zuut daodoor sjoen oet en mèt e gleeske glühwein in de hand is dat nog sjoener en sjoen. Laote veer us dao mer op riechte. In Den Haag goon ze iers informere, daan formere en oetindelek regere. Dat zal de nudegen tied in beslaag goon numme. ’t Beslaag veur de oliebolle mèt Nuijaor is gawwer gemaak en daan zien veer weer e jaor weier.
Iech wins de polltieke jonges en meidskes in Den Haag väöl wiesheid meh mèt eine vaan de slumste lui vaan Nederland aon boord moot dat oetindelek toch good goon lökke. Of dink geer dao aanders euver en weuren ’t väöl zoer bunekes???
Jan Janssen
