Allerheilige 2026

Annie: Kom Bèr, loup ins door…

Bèr:   Jaohao Annie, iech sleip miech al te barste mèt die tuut blomme veur op ’t graaf vaan sjoenma…

A: ’t is hei wel altied zoe lekker rösteg op ’t kerkhof, hè, zoe tege allerheilige…?

B:      Jao zeker, zoe doeds he……

A:  de bis noets mèt eine stek hei nao tow te kriege, mer v’r zalle toch eve de boel e bitsje moote fatsoenere, veurtot  de lui hei euver beginne te roddele….

B:      Iech zal sjoenmam dalek wel eve get greuns op häöre boek plante, kin iech geliek controlere of ze neet opgestege is….

A: Noe doech neet zoe dao euver, straks bis tiech aon de beurt en zouwste ’t toch ouch leuk vinde es nog ins iemand diech e blömke zouw bringe….

B:      Nou, miech maage ze liever veurzien vaan e dröpke, hoove ze miech ouch nog gei water te geve….

A: Nein, serieus Bèr, es tiech hei kaoms, boe zouwste daan wèlle ligke……iech bedoel op ’t aaid gedeilte of op ’t nui..?

B:      De kins doen mèt miech watste wèls, es ze dat in ‘ne kaffee vraoge zègk iech altied geere aon e vinsterke, kinste nog ins get nao boete loere…..mer hei…??? Este mer neet zoe’ne zwoere stein op miene boek lègks, want dat ligk zoe zwoer op de maog……en op dat nui gedeilte….??  dao is wel erg väöl daagleech, daan weur iech väölste broen in de zomer……mer kom, laote veer doorgoon, iech veul miech hei noets zoe op me gemaak……

A: Jehmeh Bèr kins tiech hei daan neet geneete vaan die sjoen opsjrifte en die aw zerke, en die buim en die eekheurnsjes, en……

B:      Iech wèl geere zoe gaw meugelek boete zien

A: Kiek noe ins wee hei ligk, is dat neet die vaan dewètswel, vaan de mèrret, Barbara steit op de stein, mer volgens miech hèdde ze gewoen Bèrrep….Aojao, en rech tegeneuver häör ligk dee vaan de peperkooke mennekes, toch gezèlleg zoe bijein hè…….. höbste nog ins get aonspraok..

B:      …. kiek ins hei, dee vaan dee kaffee op de Bosstraot, ….is dee zoe aaid gewoorde…??..dat is toch noe haos oonmeugelek mèt al deen draank dee dee ziech d’r in heet gehouwd……En kiek ins nao dit opsjrif:  hij ruste in vrede, nou in kaffee de vrede zalle ze bedoeld höbbe……

A: En Bèr, loer ins nao dee sjoene jong op dee foto hei, iech zou d’r gans weik vaan weure, veural mèt die plastieke blomme zoe deneve…., wel e bitsje väöl malleber…

B:      Noe weurt ’t gans sjoen….hei ’n QRcode op de stein, wach ins , mienen tèllefoon en eve scanne wat zou gebäöre es iech dat inscan…….e meziekske….’t Mestreechs volkssleed……en luuster ins nao deen teks  : gebore in e groet gezin vaan 8 kinder, opgegreujd achter ’t groet febrik, ligk hei uzze groetste  supporter……….meh jonges, zoeget wèl iech later ouch, meh daan wel get aongepaste meziek…!!

A: wat is bij diech aongepaste meziek??  Ach vaderlief toe drink niet meer ????

B:      veur diech weet iech ouch al ‘ne gooie:  zij kon het lonken niet laten……Iech geluif tot veer mer ins gaw de plentsjes goon inzètte          veurtot veer nog mie wèl ideeje kriege..       iech laot miech toch liever       macrameeje geluif iech….…

Polloed