Inhoudsopgave
Water is belaankriek, hiel belaankriek, laote veer beginne mèt dees constatering. Niemes kint zoonder water. Op de ierste plaots um te drinke want ’t minselek lief besteit veur ’t groetste deil oet water en veur de res kinne veer us wasse mèt water um us zelf proper en gezoond te hawwe.
Riggelmaoteg verblieve veer es hoeshawwe aon de waterkant en daan krijg me pas e good idee vaan ’t leve mèt en op ‘t water. Euze caravan steit langs de Maos en daodoor späölt water ’n rol in eus leve. In de winter moot me riggelmaoteg de huugte vaan de Maos in de gate hawwe. Bij hoegwater mote veer zörge tot de caravan op tied weurt weggehaold um neet in ’t water te koume stoon. In juli 2021 höbbe veer dat mètgemaak en is zelfs ‘ne caravan, wie e beutsje, de Maos aof koume drieve.
Es me zoe langs ’t water steit krijg me ouch ’n idee wat ziech allemaol op de Maos aofspeult. De sjeper die alles verveure euver de Maos weure ummertouw groeter. Sjeper vaan mie es 100 meter laank koume ummertouw miejer langs. E gek idee messjien, meh zoe e sjeep zouw neet op de Vriethof passe en zouw reike vaan ’t theater tot weier es de beelde vaan de Zate Hermenie.
Hiel aoventouw koume sjepe langs die hout verveure. Daan ligke boumstem wie zwegele opein gestapeld op dat sjeep. Me heet daan gein idee wieväöl, in gewiech, daan in op dat sjeep gelaoje ligk. Aander sjeper ligke vol mèt ’t euversjoot vaan de consumptie maotsjappij, dus aajd iezer. Aw fietse, brommers, oto restante en gaank zoemer door. Berge zand is ouch get dat riggelmaoteg langs kump.
In ’t veurjaor koume de toeristebeut langs. Die weure ouch ummer groeter en sjieker. Eder heet zien eige apparteminte op de boot en dèks mèt ’n eige balkon. Bovenop de boot kinne de lui daan ’ne ligkstool pakke en vaanaof ’t water ’t landsjap beloere boe me langs veurt.
Vaan de zomer, es de watertemperatuur ’t touwliet, beginne bij de watersportvereiniginge de ierste waterskiërs ziech te mèlle. Op de Maos weurde daan de ierste kunste vertoent.
Water is dus hiel belaankriek um dao good mèt um te goon, zoewel veur de economie es veur de gezoonheid en ’t plezeer vaan de lui. Oondertösse is in Mestreech de discussie euver ’t water e noedzakelek oonderwerp gewoorde. Wie kinne veer Mestreech besjerme tege hoegwater? In de touwkoms zouw dat wel ‘ns hoegnudeg kinne zien. En zeet gerös: de Sint Servaosbrögk oftewel de Aw Maosbrögk laote veer ech neet aofbreke!
