De ierste alweer

’t Is neet te geluive meh dees week höb iech alweer de ierste prinseproklamatie gesjreve. ’t Is weer zoewied dach iech bij mien eige. Veur miech is daan ’t sezoen begonne en moot iech mien diechaojer ope zètte um good veur d’n daag te koume.

Iech had vaan de betreffende vereiniging de gegeves gekrege euver d’n touwkomstege prins en zien gevolg. En es iech dat daan zoe lees daan stèl iech miech veur wie die lui ziech noe al mote veule. De wèts wat astrein te gebäöre steit meh de maags ’t mèt niemes deile. Zelf höbste ’t geveul aoventouw tot ederein ’t aon de geziech zuut en dat maak diech e bitteke vaan slaag.

’t Pekske moot gepas weure. Medailles mote bestèld weure. Welliech mote nui sjeun gepas weure en ingeloupe weure. Wat geit astrein gebäöre? Koume lui op hoes aon? Moot draank ingeslage weure en wie deiste dat zoe oonopvallend meugelek. Allemaol zakes die bij ’t speul vaan de vastelaovend hure en ’t speul ouch aontrèkkelek make.

Bij de stadsprins geit dat nog get offisjeler want dao doort ’t gebäöre astrein get mie es veer weke. ’t Prinselek kóppel moot dao good op veurbereid zien. Wat steit te gebäöre en wie weurt geer, ’t prinselek kóppel, die veer en ’n haaf week geleef door al wat in Mestreech gebäörd. Väöl weurt oet han genome meh dao blijf nog genóg euver um zelf te doen of te oondernumme.

De ierste proklamatie ligk dus klaor um veurgeleze te weure. Daan kint ’t maske aof en maag ederein ’t wete.

’t Is en blijf ouch ’t fies vaan de betrèkkelekheid. Oets höb iech ’t volgende veerske gesjreve:

Betrèkkelekheid

Dao steit heer daan

zoe bove op dat sjavot

Ederein loert

prakkezeert ziech kepot

loert nao de bein, de erm, ’t posteur

die beweging die kin iech, die kump bekind veur.

Wètste wee iech dink tot dao steit

loer ‘ns nao die han, wie dee deit

jao noe tot’ste ’t zègks

’t zal toch neet ……

…………

De trommele die roffele

’t maske geit aof

………………

en me huurt daan get mat

verrek, wee is dat?

’t Is en blijf e sjoen fies veur ’n ederein. ’t Bint en verbint ederein dee dit fies wèlt viere en dat is en blijf ’t sjoene vaan de vastelaovend. Laote veer dat vashawwe en daan blijf iech nog lang proklamaties sjrieve.