Inhoudsopgave
Höb iech ’t good geleze of höb iech miech verdaold. ProRail vint tot de passerel vaan de statie nao de Meerssenerweeg prima voldeit en nog jaore laank mètkint. D’r zien gein veilegheidsprobleme, concludeert me. Dat kint daan wel zoe zien meh d’r speule toch aander zakes mèt die vaan belang zien.
De passerel is veur väöl lui oet Mestreech-Oos de verbinding mèt Wyck en ’t centrum vaan Mestreech. Dao loert ProRail netuurlek aanders nao want veur hun is de passerel de verbinding tösse de versjèllende perrons en dé statieoetgaank nao d’n achterkant vaan de statie. Veur us es bewoeners vaan Mestreech-Oos is dat netuurlek aanders. Mestreech-Oos zouw veur e groet deil geblokkeerd zien es dee passerel d’r neet zouw zien of aofgeslote zouw weure. ‘r Is dus vaan de spoorwege meh eigelek ouch veur e groet deil vaan ‘ne verbindingsweeg veur de bewoeners en bezeukers vaan de stad Mestreech.
Gelökkeg heet de passerel ‘ne lif dee ’t veur ’t groetste deil vaan ’t jaor ’t deit. Veer zouwe hiel get lui e plezeer doen es dat dink ouch ’n roltrap zouw höbbe zoetot lui die minder good ter bein zien dao gebruuk vaan zouwe kinne make. Welliech tot ‘ns naoder bekeke moot weure of de functie vaan de passerel neet verbeterd kint weure.
Boete alle aanders zakes moot me constatere tot de passerel voel is, erg voel. Oonregelmaoteg weurt ‘r gepóts meh neet ‘ns groets oonder han genome. ’t Is toch - d’n entree vaan Mestreech - veur de reizigers nao eus stad en d’n iersten indrök is noe neet bepaold ‘ne propelle indrök. Dao zeet ProRail niks euver.
Loer ‘ns nao de touwkoms!
Tegeneuver de Mosa weure astrein 240 woeninge gebouwd. Es die lui die dao koume te woene de stad in wèlle mote ze te voot gebruuk make vaan de passerel. Dat is de korste weeg. Dat gelt evezoe veur de lui es de bouwplanne aon ’t vreugere KPN-terrein weure gerealiseerd. Nog ‘ns 350 woeninge. De passerel geit dus in de touwkoms intensiever gebruuk weure. Dat moot toch e signaal zien um dat dink veur de touwkoms gebruuksklaor te make en mèt d’n tied mèt te goon.
Gewoen zègke tot de passerel nog jaore mètkin is gei good verhaol. Iech dink tot ProRail z’n hoeswèrk nog ‘ns euvernui moot doen.
Jan Janssen
