En gewoen weer weier

Maondag geit ’t weer beginne. De vekansie is veurbij. Veur de kinder in eder geval. Dit jaor is euver de vekansie niks te moppere gewees. Zès weke good weer dus alle kinder höbbe boete kinne ravotte vaan de vreuge mörge tot laat in d’n aovend. De zon heet us dit jaor neet in de steek gelaote. Iech had zjus ‘nen aofspraok bij de graasj gemaak um de roetewissers vaan d’n oto te hole umtot iech die dinger neet mie nudeg waore meh aofgeloupe maondag höb iech deen aofspraok mote aofzègke. Eindelek weer rege, good veur ’t graas en de plante in d’n hoof.

De periood direk nao de vekansie is ummertouw ’n hiel drökke periood. Alles weurt weer opgestart wat in de vekansie zoe good es stèl heet gelege. De rippetisies vaan de musical “Annie” goon weer beginne want in oktober zien de ierste oetveuringe. De leedsjes mote weer eve opgefris weure, de denskes mote gerippeteerd weure en ederein zal z’n tekste mote kinne. Dus ederein moot aon de slaag.

Mèt ’t preuvenemint weurt ouch weer de zeukaktie nao ‘ne nuie stadsprins in gaank gezat. Aon ederein weurt gevraog oet te loere nao gooj kandidaote. Gegeves te verzamele en die in te sjikke zoetot ’n gooj käös gemaak kint weure. Begin jannewarie is ’t jummers weer zoewied.

Op mierdere plaotse, zeker aon de Wycker kant, zien ouch de bouwmaotsjappije weer begonne mèt bouwe. Ie veer e jaor weier zien zalle op de nudege plaotse, zeker in Wyckerveld roond de Greune Luiper, de nudege woeninge zien bijgebouwd. Eus stad zal daodoor weer aanders oetzien en zoe bouwe veer Mestreech lansermerhand e stök groeter veur de touwkoms.

’n Groete verandering zal ’t verdwijne vaan ’s Sint Maartenscollege zien. Nog twie jaor zal dat gebouw in ’t vreugere park roond villa Wyckerveld d’r stoon um daan tege de vlakte te goon en plaots te make veur ’t nui gebouw vaan de rechbaank. Dat zal veur Wyckerveld ’n ganse verandering zien. Noe koume edere mörge hiel väöl kinder nao ’t college en daan zal ‘t stèl weure umtot ze daan nao Belfort nao sjaol goon.

Nao de vekansie, es alles weer opstart, euverdink me opnui zakes die allemaol evekes stèl höbbe gelege. Dat is ’n gooj zaak um alles weer eve de revue te laote passere en Mestreech weer eve fris en fruiteg te beloere.

Euver revue gesproke! Dee tekste veur Revue aon de Maos zien ouch in de maak en via die tekste perbere veer Mestreech en de Mestreechtenere weer de spiegel veur te hawwe. Höb geer leuke suggesties of ideeje laot ’t daan eve wete. Meugelek kinne veer get daomèt. De vekansie is um en Mestreech geit gewoen weer weier.