Theater make

In 1976 stapde iech veur d’n ierste kier de achterdeur vaan de Bonbonnière binne. In ’t Steegske, achter ’t woenhoes vaan de femilie Stegen in de Batterijstraot, hadde veer (toen nog de Operette Vereiniging Maasvogels) maonde laank gerippeteerd op de kemikke opera “Trijn de Begijn” en toen zouw ’t goon gebäöre. Stèllekes leep iech d’n trap op, op weeg nao hiel väöl drökke stumme vaan aander zenewechtege speulers. 

In de petitterige kleikamers honge de kostuums en waors ederein drök bezeg mèt umkleie, inzinge, tekste herhaole en gaank zoe mer weier. De zenewees zörgde ouch deveur tot ’t sloot op de toilètdeur constant op roed stoont en veur de deur ’n rij ziech opstelde. Mèt de hand op ’t vötsje woort door inkele gewach tot ze verlos woorte.

Wie ’t tied waors veur de ouverture stoont ederein gereid in de coulisse um aon ’t stök te beginne. De lui in de zaol woorte stèllekes aon stèl en luusterde nao de meziek. De spanning achter de buun waors um te snije, ’t dook ging ope en veer begóste aon ’t make vaan theater. Deen ierste kier vergit’ste noets. Die aonstekeleke loch die bij ’t theater make hoort, die loch höbste ingeaosemd en die liet diech noets mie los.

In de poos kroop ’t gans gezèlsjap in de piepklein kantien. Veurziechteg dorf mennegein ziech al e glaas beer te permitere want ’t ging jummers al gans good en ’t publiek reageerde enthousias en ammezeerde ziech aon ’t speul. 

De buun waors sprookjesechteg aongekleid. De Hottentotte zaote in e landsjap dat gedomineerd woort door ‘ne groeten olifant boe me euver en oonderdoor kós loupe. De buun waors aon de kleine kant veur ’t gans gezèlsjap meh ederein pasde ziech aon en doog zien uuterse bès. De kostuums waore apaart te numme. Iers waore veer allemaol verkleid es Hottentotte en naoderhand es Laplenders. 

Zoe’nen ierste kier blijf in d’n memorie haange. Plezeer waors de veurnaomste driefveer um aon zoe e stök mèt te doen. Vriedagaovend woort in ’t Steegske gerippeteerd en nao de rippetisie bleef ’t nog lang oonrösteg in de Batterijstraot. ’t Ceciliafies woort ouch neet euvergeslaage en ’t sjoenste waors daobij daan de Kraom vaan Tante Betsje. Vaan de Mosa en de Sphinx waors daan ’nen houp aofgekäörd porselein betrokke en daan mochste veur e wöllemke mèt kouseballe ’t serviesgood kepot goeje. Klante genóg um ziech ’ns heerlek oet te leve. 

En op nao ’t volgende stök “Mie Fien Mamzèlke” mèt mien ierste rol, die vaan Heerleneer mèt d’n tèks: “Ken u mij ook zègge waar of ik vandaan kóm?”

Theater make is en blijf bezunder. Este door dat virus bis bevaange hölp niks aanders es gewoen d’raon touwgeve.