Nog eve d’r tössenoet

De vekansie is zjus achter de rögk en alles begint weer ze normaal gengske te goon en toch stik daan de zin de kop op um nog eve d’r tössenoet te goon. Gek is dat eigelek, neettaan?

In Duitsland waors dat vreuger jaore, en welliech noe ouch nog, d’n tied tot de manslui ziech bijein pakde en daan op keigelweekend ginge. D’r woort ’n gezèllege plaots oetgekoze en dao ginge ze nao touw um dao e weekend, neve keigele, ziech oonderein te ammesere. In deen tied waors haos gein hotel te boke want alles zaot vol mèt manneclubkes.

Bij us thoes is noe ouch ’t idee gekoume um nog eve, veur alles weer ech begint, d’r tössenoet te trekke meh boe nao touw? Es me op facebook geit zeuke is de käös royaol en dat maak ’t meujelek um ’n gooj käös te make.

Jaore geleie zien veer mèt de caravan in de Elzas terech gekoume. Vlak bij Colmar in ’t pläötske Saint Croix en Plaine op ’n sjoen greun camping. ’t Weer zaot hielemaol mèt. Mien vrouw had allein kleier bij ziech veur kaw naojaoraovende en dat waors dus gaaroet neet ’t geval. De zon sjeen heerlek en ’t einegste bluuske dat ze mèt had mós ederen aovend oetgewasse weure um ‘t ‘nen daag later weer opnui aon te trekke. Mèt dees sjoen herinnering in gedachte weurt de käös veur de Elzas netuurlek e stök gemekeleker meh stèl tot ’t dao noe d’n hielen tied geit regene en daan? Wat is wiesheid.

De kins ouch gewoen ’t vleegmachien pakke en zuiderleker goon boe de garantie op good weer groeter is. Meh boe daan nao touw? Roeme steit al e tiedsje op ‘t verlanglieske. Dao is zoe väöl te zien en te beleve. Allein este get wèls goon ete mooste oplètte. Jaore geleie hadde veer us laote verleie um mèt ’n jonge mins, dee folderkes oetdeilde vaan e restaurant, um dao daan mer te goon ete. Wie ’t tied aofrekene waor mooste veer ouch betaole veur ’t gebruuk vaan teleure, metser, lepele en versjètte. Veer voolte us daoneg bij de neus genomen meh dat maak diech oplèttender um diech geinen twiede kier te laote pakke. Roeme is wel väöl loupe dus ’n gooj conditie is ’n gooj zaak. 

Wat tunks uuch vaan Peries. Dat is ouch väöl loupe en dinger bekieke. Dat kint dus ouch ’n meugelekheid zien.

Stèllekes dink iech tot ’t toch de Elzas geit weure. Urges e klein dörpke boe noe de droeve zoe stellekes aon riep beginne te weure en de wienboere zenewesechteg zien. Weurt ’t good jaor en zien de droeve op smaak? De zon heet evels mie es zien bès gedoon um alles good riep te laote weure. Noe gein hagelbuie mie en alles op tied binne hole. 

De Elzas is ouch de streek vaan de “choucroute elsacienne” en dat is toch get um mèt te laote waoge in ’t oetindeleke besluut, neettaan?