Inhoudsopgave
Aofgeloupe maondagaovend stoonte veer, de speulers vaan de Bokkenrijders, op de Vriethof um de lèste veurstelling te speule. Wat waors dat bezunder! Este oetkeeks euver ’t plein zaogste dao 7500 lui zitte die kaome kieke en genete vaan eus speul. E sjoen verhaol euver get wat ziech in ’t verleie in eus provincie heet aofgespäöld, woort door us in scêne gebrach. Wat ’n prachtege aofsleting!!
Al dekser höb iech op de Vriethof mie dingk mage doen en dat is en blijf bezunder. Mestreech heet de Vriethof nudeg. Fons Olterdissen wis dat ouch al in d’n tied tot heer veur spectakel zörgde in Mestreech. De Vriethof weurt neet veur niks de hoeskamer vaan Mestreech geneump. Olterdissen gebruukde de Vriethof ouch veur de massa-speule vaan de Heilegdomsvaart. Daan wis heer ’t vereinegingsleve vaan de stad te mobilisere um de lui vaan Mestreech en de naoventrint te laote kinnis make mèt ’t riek Roomse leve en wie Mestreech dat door de iewe heer had beleef.
Huub Noten deeg häöm dat nao. Nog ummer spreke de lui euver ’t sjoen Heilegdomsvaart speul “’t Gouden Huis”, woebij de Noedkis en de veriering vaan euze stadspetroen Sint Servaos centraol stoont.
Get later deeg Sjeng Verheijden mèt zien speul dat ouch. ’t Vriethof en de entourage vaan ’t plein bleef en blijf trekke.
Al ierder, in d’n tied vaan Karel de Vijfde en ziene zoon Philips de Tweede, roond 1550 woort in eus stad de Vriethof gebruuk um de Spaonse keuning en ziene zoon te oontvaange en fies te viere. De Vriethof is ummertouw ’t middelpunt, ’t centrum, vaan eus stad gewees en zal dat ouch altied blieve.
De magie vaan ’t Vriethof heet netuurlek te make mèt alles roontelum de Vriethof wat ’t zoe uniek maak. Op de allerierste plaots is dat netuurlek de Sint Servaosbasiliek. Eine groete brok historie mèt d’n absis en de twie tories die ’t plein zoe bezunder make. Daan netuurlek de Sint Janskèrk mèt de sjoene roeien tore dee 69 meter bove alles oetstik. D’n Hoofwach is al eve uniek te neume.
Daan is d’r ’t Spaons Gouvernemint. ’n Uniek gebouw mèt ’n rieke historie. Wie euze keuning Willem Alexander zien verloofde, Maxima, aon Mestreech kaom veurstèlle woort heer nao dit gebouw geleid um nao ’t ierste verhaol euver de rieke historie vaan Mestreech te koume luustere. Pieke Dassen en Philip Dumoulin speulde Karel de Vijfde en Philips d’n Twiede.
De kant vaan de Vogelstruijs en de Momus zörge veur ’t aander deil vaan de Vriethof. D’n Theater ao ’t Vriethof, mèt ziene rieke historische gievel, zörg tot ’t Vriethof aon alle kante sjoen umslote weurt.
Mèt rech en zeker e bitteke sjovinistisch mage veer gruuts zègke tot ’t Vriethof ’t sjoenste plein vaan ’t land is.
Van onze redactie
