De Bonbonnière

Dinsdagaovend waors de gemeinteraod oetgenudeg um nao de Bonbonnière te koume. Ederein waors nuisjiereg nao wat us vertèld zouw weure euver wat mèt dit gebouw geit gebäöre en wienie dat geit gebäöre. ’t Veel evels behuurlek tege. Veer woorte oontvaange in de kaffee, daonao ginge veer nao de Redoutezaol en oetindelek nao d’n theaterzaol, de eigeleke Bonbonnière. Dat waors ’t en dus zien veer niks wijzer gewoorde. Gein inhawwelek verhaol, gein historie en gein touwkoms. De einegste vraog die woort gestèld ging euver ’t takele vaan decorstökke en of ‘ne lif meugelek is zoetot weer decors gebruuk kinne weure.

In ’t verleie waors dat takele ein vaan de punte die zier väöl discussie te weeg brach. Groete vrachwagele kinne amper bij ’t gebouw koume en es ze achteroet rije make ze e piepgeluid. De zals mer in de naoventrint woene en dekser oet diene slaop weure gehaold door zoe’ne vrachwagel. 

De vrachwagel laoje gebäört door lui en die mojle oonderein. Ouch dat waors veur de lui oet de naoventrint e punt vaan discussie. En de kins noe einmaol neet lui verbeeje um oonderein te praote en aonwijzinge te geve euver ’t laoje vaan de vrachwagel.

Dus de vraog euver de lif waors welliech terech meh gezeen de historie roond ’t gebouw blieve de klachte, oondaanks ‘ne lif, gewoen bestoon.

Decors zien allewijl väölal mèt ledsjerme op te losse. Es me dus in de Bonbonnière in investering wèlt doen door ledsjerme aon te koupe en te installere kin al väöl opgelos weure en heet me hiel väöl meugelekhede direk in hoes. Meh veer hure astrein wat de kwartiermaakster in gedachte heet en mèt wat veur oplossinge zij kump. Me maag neet veuroet loupe. Aofwachte is noe gebooje.

In 1976 bin iech begonne in de Bonbonnière es kemediespeuler. De ierste productie boe iech aon mètdoog waors de kemikken opera “Trijn de Begijn” mèt Miety Vermin es Trijn en Mao Willems es keuning Katchimboe. Truus Willems waors de kokeers die de femilie Kriekelezaank in de sópketel moos doen en sóp vaan hun mós trekke. De decors waore hoofzakelek deuk en die kint me oprolle. Deen tied is evels wied veurbij. 

De Bonbonnière heet ummer ’n bezunder plaots ingenome bij ’t Mestreechs publiek. De zaol is klein, compact, en daodoor heet ’t get gezèllegs en knus. Daat moot behawwe blieve en daan zien veer wel boe ’t sjeep strand. Hopelek hure veer de volgende kier get mie es aofgeloupen dinsdag.