Inhoudsopgave
’t Is oetzunderlek werm, dat zal niemes oontkinne. Meh alles geit gewoen door. Ederen aovend stoon alle speulers vaan de Bokkenrijders klaor um opnui ’n geweldege veurstelling te drejje. Väöl klaor water, get groete ventilators en veural rösteg blieve hölp um de veurstelling te make.
Bij de gemeinteraod geit ouch alles gewoen ziene gaank. De wèthawwers zien beneump en kinne aon de slaag goon. Veer höbbe zelfs ‘ne wèthawwer gekrege veur de “Mestreechter Taol”. Bin benuid wat dee mins allemaol geit doen en oetvinde um eus Mestreechter taol te goon promote. ’t Is nudeg zal iech uuch zègke want Mestreech wèlt greuje nao 140.000 inwoeners. Dee aonwas vaan inwoeners zal vaan boete Mestreech mote koume. Te leze is tot de koupwoeninge en heurwoeninge in Mestreech veur starters en midde-inkoumes neet mie te betaole zien. Iech dink dus tot jong Mestreechtenere, starters dus, hunnen touwvlöch mote zeuke boete Mestreech. Veur midde-inkoumes gelt: blief zitte boe’ste zits en verreur diech neet. In Mestreech woene is oonbetaolbaar gewoorde. Dus deen aonwas nao 140.000 zal dus door aandere gerealiseerd mote weure. Veur eus Mestreechter taol en eus Mestreechter tradities ligk dao dus ‘ne groeten opdrach veur ‘ne wèthawwer es heer wèlt behawwe wat veer tot noe touw höbbe opgebouwd.
Iech zouw, es iech häöm waor, al ‘ns beginne mèt ‘ne ganse maond in ’t kader te stèlle vaan de Mestreechter taol. Trek get subsidie oet veur alle vereiniginge in Mestreech die ziech in eus eige taol wèlle prizzentere. Zörg veur locaties boe koere, fanfares en hermenieje ’t Mestreechter rippertoire kinne laote hure. Laot toneel- en operettevereiniginge aon de gaank goon in eus eige taol. Laot Mestreechtenere ziech weer in hun eige taol oetdrökke door verhaole, gediechte en aandere proza in bookvörm oet te geve. Vreuger hadde veer “Maastricht schrijft en dicht” en geef veur zoeget, meh daan in ’t Mestreechs, de ruimte um eus Mestreechter hart weer die ruimte te geve. Dezember liekent miech ‘ne sjoene maond um Mestreech in keerssfeer extra te laote straole. D’r zien al Mestreechter keersverhaole te beluustere op mierdere plaotse, versjeiene hermenieje geve concerte mèt es intermezzo’s Mestreechter verhaole en gediechte. Veer höbbe, menier de wèthawwer, gein behoofte aon deur oonderzeuke en rapporte meh veer, de Mestreechter vereiniginge, wèlle gewoen aon de slaag en laote zien wie sjoen eus taol en eus tradities zien. Get duite kinne daobij good helpe.
Restaurants kinne Mestreechter gerechte op de kaart zètte. Mestreech is zoe riek aon alles en alles. Laot lui hunne gaank goon, ambitie en inspiratie zit jummers in alle lui.
Eder jaor e ‘Mestreech Jaor’ geit get erg wied, meh eine maond in ‘t jaor is toch e good veurstèl al zègk iech ’t zelf!
