De vlam vaan Minckeleers

In de gemeinteraod is op dit memint ’n discussie de kop op aon ’t steke of de vlam vaan Minckeleers op de Merret weer moot goon branne. Jan Pieter Minckeleers heet evels neet ummer ’nen toorts mèt vlam in zien han gehad, dat op de ierste plaots, en ten twiede: is die vlam die heer in zien han heet wel terech? Wat heet dee gooje mins eigelek oetgevoonde? Höbbe veer us dat wel ‘ns aofgevraog?

Heer waors perfessor/hoeglieraar/oetvinder en verbonde aon de katholieke universiteit vaan Leuven in Belzj. Zien collega’s waore, euver ’t algemein, geisteleke en umtot me meinde tot heer dat ouch waors heet me dee gooje mins ’n soutane / ‘nen toog aongetrokke. Eigelek zouw heer, gekleid nao zienen tied, ’n kneebrook aon mote höbbe, meh dat is door de kunsteneer dee ’t beeld gemaak heet aanders begrepe. In de Belzje plaots Heverlee steit ouch e beeld vaan Jan Pieter Minckeleers en dao heet heer wel ’n kneebrook aon.

Heer doog, es oetvinder, oonderzeuk nao alle soorte vaan gaas en op zekeren daag heet dee gooje mins get kole in ’n aofgeslote ruimte, zoonder tot dao loch bij kós koume, geplaots. Dat is heer vaan boetenoet goon verwerme en toen kaom, oontdekde heer, oet die verwermde kole gaas vrij (lichtgas) en dat steinkolegaas kós me o.a. gebruke um luugte, via e kuiske, te laote branne (te laote gleuje) zoetot veer saoves en snachts leech kóste höbbe en de straote en pleine in eus stad kóste verleechte.

Dat gaas is ouch liechter es loch dus me zeet tot euze Jan Pieter aon de basis heet gestaande vaan de lochvaart want me kós mèt dat steinkolegaas ‘nen lochballon völle en laote opsteige.

Dus mote veer us terdege aofvraoge: “Is die vlam wel terech die heer in zien han heet?”. Heer heet ’t steinkolegaas neet oetgevonde um ’t te laote opbranne meh um dao aander dinger mèt te doen. Steinkolegaas woort o.a. gebruuk um stadsverleechting aon te lègke. Euze Petrus Regout heet dao later daankbaar gebruuk vaan gemaak wie Mestreech stadsverliechting kraog.

Veer doen Jan Pieter Minckeleers mie ier aon door te zörge tot die veer sjoen awwerwètse lanteriepäöl die roontelum zien beeld stoon optimaol in stand te hawwe en te laote branne (ouch al is dat allewijl led-verliechting).

Boete dat alles is Jan Pieter Minckeleers ‘ne Mestreechteneer um gruuts op zien. Heer heet terech e standbeeld gekrege en e sjoen pläotske op de Merret. Laote veer dat in iere hawwe, mèt of zoonder vlam.