Veur de lèste kier

Inhoudsopgave

Vendaog, vriedag d’n 10^e juli 2026, zal veur väöl kinder de lèste kier zien tot ze nao de basissjaol goon. Ze slete daomèt ’n periood vaan mie es ach jaor aof tot ze ederen daag nao dezelfde sjaol ginge. Dezelfde vrundsjes en vrundinnekes troffe en eder jaor vaan klaslokaal veranderde en doorsjove nao ’t achtste jaor um sjaolverlaoter te weure. De citotoets gaof ziech op de kinnis en vaardeghede vaan de sjaolverlaoter en mèt de gegeves vaan dee toets en de kompleminte vaan de sjaol woort veur de nui sjaol, ’t vervolgoonderwies, gekoze. Belaankriek is dat en ’t gegeve of me weurt touwgelaote op die nui sjaol huurt ouch bij dees periood in ’t leve vaan ‘t keend. De touwkoms, wie veurziechteg ouch, kump al um d’n hook loere. ’t Keend weurt vaan vendaog op mörge inins puber.

De käös is noe gemaak en goodgevonde en is veur väöl kinder e besluut dat nogal get te beteikene heet. Dao hure emoties bij want euver ’t algemein valle de gróppe, die ach jaor höbbe bestaande, noe oetein. Neet eder keend geit nao ’t zelfde vervolgoonderwies. Dao hure ouch traone bij, laot dat gezag zien.

’t Is e bezunder gebäöre dat sjaolverlaote. Alleriers geit de gróp op sjaolverlaoterskamp. Nog eve same op de fiets nao ’n oonbekinde plek um dao, veural nog ‘ns same, get daog door te bringe. Dat is spannend. E tiedsje weg vaan thoes en in e vreemp bèd slaope tösse aander stoer jonges of kichelende meidskes. Dao weurt amper geslaope en wie ‘ne kepotten hoond kaome ze daog later weer trök bij pap en mam. Meh ’n ervaring rieker en … wat höbbe veer gelache en lol gehad!!!

Dees week waore de awwers en groetawwers de gaste vaan gróp ach vaan basissjaol Aloysius aon de Breuselsestraot. In theater Kumulus zatte de sjaolverlaoters hun bèste beinsje veur bij de musical “alle stoppen slaan door”. Veerentwinteg lierlinge, allemaol talente, lete ’t publiek zien wat ze in ach weke vaan boete hadde gelierd. De meister leet wete tot ze ziech neet hielemaol aon ’t script hadde gehawwe en eige interpretaties hadde ingebrach. Dat is knap en liet zien tot ze neet alles veur zeute kook numme en eige inbring wèlle höbbe.

Ederein deeg mèt en had ’n rol in de musical. Ze wiste ’t publiek aanderhaaf oor te boeje en kraoge daan ouch ’n staonde ovatie op ’t ind. Vendaog, vriedag, weure ze um 11 oor de sjaol oetgesjik. Weg mèt uuch! Gaot de wereld oontdèkke en groet en volwasse weure. De basissjaol zit d’rop!

Noe is ’t tied veur vekansie, ’t zwumbad en eve niks doen en welliech same mèt pap en mam e vreemp land bezeuke. Geneet devaan en, veur astrein in augustus, succes in de nui sjaol!